ILOILO CITY – Nahamyang na sa puluy-an sang pamilya Claveria sa Rizal Ilawod, Cabatuan, Iloilo ang tul-an sang Ilonggo worker nga si Angelo Claveria nga ginpatay sa South Korea.
Alas 9:18 sini nga aga sang naghugpa ang Philippine Airlines Flight PR2141 nga dala ang tul-an ni Claveria nga nasulod sa wooden casket.
Ginsugat ini sang mga himata nga lunsay nakasuksok sang puti nga bayo kag may nakasulat nga “Justice for Angelo Claveria.
Nagserbe man nga salakyan sang pamilya padulong sa Iloilo International Airport ang patrol sang Bombo Radyo Iloilo.
Gilayon nga gindretso sa balay sang pamilya Claveria ang tul-an, sa diin nagahulat man ang iban pa nila nga mga himata.
Kalisod kag kalipay naman ang nabatyagan sang pamilya sa pagpauli ni Angelo nga bangkay na
Suno kay Haide, tiya ni Angelo, ila ginakasubo ang nadangatan sang hinablos apang ila man nga ginakalipay nga nadala na ini pauli agud mangin malinong na ang kalag kag mahatagan sang nagakaigo nga lubong.
Masakit lang suno kay Haide sa ila bahin tungod brutal ang pagpatay kay Angelo kag kaangay pa nga mga Pinoy ang may kahimuan.
Dugang pa sini, isa ka mabuot kag wala sang gamo kag bisyo nga tawo ang iya hinablos.