Mahimo matapna ang severe nga balatian sa mata pinaagi sa pagkaon sang mga utanon nga manggaranon sa lutein kag Vitamin A.
Sa interview sang Bombo Radyo kay Dr. Karen Francia, isa ka Opthalmologist, iya ginpahayag nga nagakadapat nga indi pagpabay-an ang mga mata bangud naga-angkon man ini sang balatian kag posible nga maguba kun indi pagtipigan kag hatagan sang igtalupangod.
Suno kay Francia, agud makalikaw sa mga seryoso kag severe nga balatian sa mata kaangay sang glaucoma, diabetic eye disease kag catarata, mahimo sundon ang mga masunod:
- Magkaon sang mga pagkaon nga makapamaayo sa mata kag puno sang lutein kag Vitamin A, kaangay sang tangkong, broccoli, ugbos sang kamote, kulitis, kalabasa kag kamatis;
- Magsuksok sang sunglasses nga makaprotekta batok sa ultraviolet rays (UV rays) nga posible “makasunog” sa retina sang mga mata.;
- Masami nga magpanghugas sang mga kamot agud makalikaw sa sore eyes;
- Masami nga mag-ehersisyo sa sulod sang 30 minutos kada adlaw agud malikawan man ang balatian nga glaucoma nga nagahatag sang mataas nga pressure sa mata; kag
- Likawan ang mga masilaw kaangay sang paghimutad sa adlaw kag pag-atubang sang tuman ka lapit sa computer screen kag cellphone.
Dugang nga abiso sang doktor, mas maayo nga ipahuway sang masami ang mga mata kun may tinion kag magtulog sa sulod sang pito tubtob walo ka oras adlaw-adlaw.
