ILOILO CITY – Nagbinuligay ang pila ka mga vendor sa Iloilo Terminal Market agud nga makatipon sang donasyon para sa mga apektado sang lockdown sa syudad sang Iloilo.
Paagi sa Bombo Radyo Iloilo, naglab-ot sa 2 ka sako sang bugas nga nagabug-at sang 50 kilos kada isa ang gin turn-over sa Iloilo City Government.
Magluwas sa bugas, lakip man sa mga gindonar sang anonymous donors amo ang 2 ka karton sang sardinas, 4 ka karton sang noodles, 8 ka pack sang pancit canton, 1 ka sako sang bihon, 1 ka sako sang kalabasa, tunga sa sako nga calamansi, 3 ka bilog nga cabbage, 5 ka bilog nga sayote, 2 ka bilog nga langka kag tag 3 ka kilo nga batwan, ahos, bombay kag carrots.
Ang nasambit nga goods ang gindul-ong gilayon sa Jaro Gym para sa repacking.
May kaangtanan diri, nagapasalamat gid si Iloilo City Mayor Jerry Treñas sa tanan nga nagpalab-ot sang bulig.
