ILOILO CITY- Nagatalang-talang ang mga vendors kun sa diin sila magapwesto sa ila relocation site sa Cacho Property sa JM Basa Street, Iloilo City.
Sa interview sang Bombo Radyo kay Manang Norma, vendor sang Ready to Wear( RTW), iya ginpahayag nga apisar ginhatagan sila sang mga numero sang ila pwesto, apang wala sang klaro kun paano sila iplastar.
Suno kay Norma, makaluluoy man ang ila sitwasyon bangud nga wala sila sang pasilungan sa tion nga mag-ulan kag malutak pa ang lugar.
Iya man ginpahayag nga mabudlayan sila sa bag-o nila nga lokasyon ilabi pa nga naandan na nila ang ila daan nga pwesto sa dalan Alduguer sa diin sila nagabaligya sa sulod sang masobra apat na ka dekada.
Suno naman kay Hector Protocio, vendor sang mga chichiria nga gin-relocate man sa Cacho property, pat-ud nga mamag-uhan ang ila mga suki sa ila bag-o nga pwesto.
Suno sa iya, dako nga kadulaan sa ila kita ang pagsaylo sa ila gikan sa dalan Valeria sa diin manami ang bentahanay sang ila negosyo.
