ILOILO CITY – Nagalalain ang pila ka mga vendors sa Iloilo Central Market bangud halos indi sila makabawi sa kita sang ila negosyo.
Ini umpisa sang ginsaylo sila sa ila bag-o nga pwesto.
Sa interview sang Bombo Radyo kay Loudes Cordon, vice president sang Association of Stall Owners and Transient Vendors (ASTRAVEN), iya ginpahayag nga sang yara sila sa sulod sang merkado, nagaginansya sila sang 75%.
Apang sang nagsaylo sila sa ila bag-o nga pwesto, haloson pa nga makaginansya sila sang 50%.
Suno kay Cordon, nagasala pa ang iban nila nga mga customers sa pagtultol sang mga pwesto sang tagsa ka mga vendors.
Magluwas sa mainit, tuman man ka kitid ang ila pwesto kag ang alagyan mismo sang ila mga customers.
Ginpahayag sini nga naintindihan nila nga para sa kaayuhan sang mga vendors kag customers ang rehabilitation sang merkado, apang kuntani ulikdon man ang ila sitwasyon.
