ILOILO CITY – Nagareklamo ang pila ka mga vendors bangud sa mahal nga arkila sa bag-o nga stalls sa Iloilo Central Market.

Sa interview sang Bombo Radyo kay Mr. Rex Donasco, president sang Association of Stall Owners and Transient Vendors (ASTRAVEN), iya ginpahayag nga sang una nagabayad sila sang P5,000 nga arkila kada bulan sa ila pwesto.

Apang dako ang ila pwesto kun ipaanggid sa subong nga mga stalls.

Suno kay Donasco, sa subong, nagabayad sila sang P3,000, apang tuman kakitid sang ila pwesto.


Ginpahayag sini nga sang una, makapungko sang insakto ang ila mga customers, apang sa subong, wala sila sang maayo nga pwesto dugangan pa sang mainit nga lugar.

Magluwas diri, wala man naplastar maayo ang sectioning sa merkado sa diin nabudlayan pa ang mga customers sa pagpangita sang mga pwesto sang ila suki.

Nahibaluan nga maga-umpisa naman ang pagpangkudal sa palibot sang merkado bilang pagpanghanda sang patigayunon nga pag-rehabilitate sini.