Nagapabilin na lang nga nagabaligya sa kilid sang dalan ang mga vendors sa Iloilo Terminal Market matapos nga gin-demolish ang ila pwesto.
Sa interview sang Bombo Radyo kay alyas Bebeng, iya ginpahayag nga sila mismo nakibot nga gin-demolish na ang ila pwesto matapos nga una ginhambal sa ila nga sa October 20 pa bak-bakon ang ila pwesto.
Pahayag niya nga wala pa gid sang pinal nga adlaw kun sano sila pwede makasaylo sa bago nga human nga merkado rason nga ginhambalan sila nga mapahuway na lang anay sa duwa ka semana ukon mansig pangita na lang sang ila pwesto nga pwede mabaligyaan.
Rason nga sa higad sang dalan na lang sila nagabaligya sang ila produkto bangud nga kun magpahuway sila wala sila sang kita ukon kwaan sa adlaw-adlaw nga palangabuhian kag maguba man ang ila nga mga paninda.
Suno kay alyas Bebeng, matapos nga ma-demolished ang ila pwesto madamo sang problema sila nga gina-atubang pareho sang tyempo nga tuman kainit para sa ila magbaligya kun aga kun sa diin ginpahayag niya nga basi kada gab-i na lang sila mabaligya apang indi man ini mahimu bangud maapektohan man ang ila kita.
Bangud nga sa kilid sang dalan na lang sila nagabaligya, gina-pangtagpi-tagpi na lang sang mga vendors ang mga trapal para may ara lang sang masilungan pareho sang gulpi nga pagbubu sang ulan kaina sang hapon.
Dugang pa niya, ginahatag na lang nila ang ila paninda sa manubo nga presyo para lang maubos ang ila paninda bangud wala sila sang pwesto nga mabutangan sang ila bilin nga mga paninda.
Ginpahayag pa ni alyas Bebeng, bisan ginpangguba ang ila pwesto tani ginhatagan man sila sang temporaryo nga pwesto bangud nga daw naga gwa sila nga bulante nga nagabaligya sa higad sang dalan.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
