Wala pa sang kasiguraduhan kun san-o makasaylo ang mga vendors sa Mandurriao Public Market sa ila temporaryo nga relocation site bangud wala pa sang butangan sang 14 ka iban pa nga stalls.
Nahibaluan nga pagasuguran na ang rehabilitation sang amo nga merkado sa subong nga tuig.
Sa interview sang Bombo Radyo kay Norman Jor, vice president sang Mandurriao Public Market Vendors Association, iya ginpahayag nga tuman na ka gutok kag kakitid sang relocation site sa gymn sang Barangay Oñate De Leon kag sa Mandurriao Plaza amo nga wala na sang plastaran sang 14 ka iban pa nga stalls.
Suno kay Jor, ginapadali-an na nga may makita nga lugar agud nga makasaylo na ang tanan nga vendors.
Ginalauman man nila nga makasaylo sila sa katapusan sang Abril.
Sa subong, ginabanta 200 ka mga vendors ang may lugar na sa relocation sites kag makapadayun sang ila negosyo.
