Madamo sang pumuluyo nga wala sang travel pass ukon identification card (ID) ang ginpabalik sa ila nga mga lugar kadungan sang una nga adlaw sang border control sa Iloilo Province.
Sa interview sang Bombo Radyo kay Police Master Sgt. John Tarumba, team leader sang Iloilo Provincial Mobile Force Company nga nag-augment sa border control point sa Oton, Iloilo, iya ginpahayag nga kadam-an sa ila nga mga ginpabalik ang wala sang dala nga quarantine pass, travel pass ukon identification card (ID).
Suno kay Tarumba, wala naman sang rason nga hatagan pa nila sang konsiderasyon ang mga wala sang dala nga valid ID, travel pass, ukon quarantine pass bangud makapila naman ini gin-anunsyo kag ginpahanumdom sa publiko.
Abiso sang pulis, pakamaayuhon nga magdala sang company ukon valid nga ID, travel pass kag quarantine pass kag ipresentar sa checkpoints agud malikawan ang malaba nga trapiko.
Sa bahin sang border control point sa Pavia, Iloilo, naeksperyensiyahan man ang malawig nga trapiko bangud sa pila ka pumuluyo nga wala sang dala nga ID, quarantine pass, kag travel pass apang gilayon man nga nakontrol kag nangin tayuyon ang paglabay sang mga salakyan.
Sa interview sang Bombo Radyo kay Police Lt. Col. Jojo Tabaloc, hepe sang Pavia Municipal Police Station nga nag-augment sa border control sang Pavia, Iloilo, iya ginpahayag nga nagalaom sila sang padayon nga kooperasyon sang mga pumuluyo agud mapadasig ang pagpatigayon sang checkpoint.
Suno kay Tabaloc, isa man sa pagpanghangkat ang kakulang sang pulis nga naga-augment sa banwa sang Pavia sa diin kapin pito kabilog ang borders diri.
Bangud sini, may mga force multiplier kaangay sang traffic enforcer kag mga barangay tanod nga nagabulig man sa pagbantay sa tanan nga border kag checkpoint sa Pavia, Iloilo.
