JANIUAY, ILOILO – Ginpatpat sang 14 anyos nga solterito kun paano ginhimu sang iya amay ang paghimulos-patay sa 19 anyos nga dalagita sa Brgy. Abangay, Janiuay, Iloilo.
Santo sa sworn affidavit sang 14 anyos nga anak sang suspek, sang adlaw nga natabo ang krimen, nagpadulong sila sa balay sang abyan sang iya amay.
Sang amo nga tion suno sa menor de edad, hubog ang iya amay nga si Rhegie Levoit Sr. kag sang naka-abot na sila sa puno sang paho, ila nasumalangan ang biktima nga si Ronalyn Bravio.
Hinali nga ginbutong sang iya amay ang buhok sang biktima, ginguyod padulong sa talamnan, ginlampos sa duta, gin-ubahan, gingapos ang kamot kag ginbuno sa tiyan gamit ang icepick sa diin nagamuklat pa suno sa menor de edad ang mata sang biktima apang wala na nagahambal.
Wala pa nakuntento ang iya amay suno sa 14 anyos nga solterito sa diin iya pa nga ginguyod padulong sa isa ka kamalig ang biktima, ginpasandig sa
kahon, gingapos ang tiil, nag-uba sang shorts ang iya amay kag ginhimuslan ang biktima.
Ginpahayag man sang menor de edad nga ginsaway pa niya ang amay apang bangud sa kahadlok, wala siya sang may mahimo kundi tumanon ang ginasugo sa iya.
Gin-uyatan niya sa ulo si Bravio agud nga indi makahulag apang nakabato pa ang biktima kag sa pihak sini, nagmadinalag-on sa gihapon ang iya amay.
Pagkatapos mahimuslan sang amay ang biktima, siya naman ang ginsugo nga magbulos sa paghimulos sa biktima apang wala niya ini ginpati.
Sang ulihi, gingapos pa gid kag ginbusalan, ginlampusan sa ulo kag ginhigtan sa liog ang biktima kag ginbilin ang bangkay sang biktima.
Nagpauli sila nga mag-amay sa ila balay kag iya nga ginhagad ang iya manghod nga magpanulo sang damang tubtub nga ila nasumalang ang duha nga nagapangita sa biktima.
Bangud sa kahadlok, ila nga ginbuligan ang duha tubtub nga nakita ang lawas sang biktima, ila ini nga ginhakwat padulong sa higad sang dalan tubtub nga nakapangayo sila sang bulig agud nga madala sa hospital ang biktima.
Samtang, nakatawag pa sa iya kahagugma ang 19 anyos nga dalagita nga ginhimuslan-patay sa Brgy. Abangay, Janiuay, Iloilo.
Santo sa sworn affidavit ni Robe Chris Natividad, 19 anyos, hapon sang Oktubre 26, yara siya sa bangga sang Brgy. Patong-Patong, kag nagatawganay pa sila sa cellphone sang biktima nga si Ronalyn Bravio.
Nakatu-ad pa sa iya si Bravio nga mabakal sang siomai sa tyangge apang kun wala, mabakal na lang siya sang habon.
Bangud nga madamu sang naga stand-by nga lalaki sa tyangge, nagderetso ang biktima sa isa pa gid ka tyangge agud nga makabakal sang iya kinahanglanon.
Sa kadugayon sang ila nga pag-istoryahanay sa cellphone, nakasabat pa sa iya ang biktima nga nakita niya sa dalan ang suspek nga si Rhegie Levoit Sr. kag ang iya 14 anyos nga anak.
Sang ulihi, na-utod ang ila pag-istoryahanay nga duha apang sang iya na nga gintawgan liwat ang biktima, wala na ini nagasabat.
Bangud sa kakulba, iya nga ginpadulungan ang balay ni Bravio agud nga hibaluon ang iya kahimtangan.
Sang makumpirma nga wala sa ila balay si Bravio, nagpadul-ong siya sa tyangge nga ginbaklan sang biktima apang iya nakumpirma nga madugay na ini nga nakapauli.
Bangud sini, ila nga ginpangita si Bravio tubtub nga iya nga nakita ang tsinelas sang biktima sa higad sang dalan.
Didto kag nagbaskog pa gid ang iya pagpati nga may natabo nga malain sa biktima tubtub nga ila nakita ang mag-utod nga nagapanulo sang damang.
Ila pa nga ginhingyo ang mag-utod nga anak sang suspek nga magbulig sa pagpangita kay Bravio.
Ginpahayag man sang natungdan nga sa dalayon nila nga pagpangita, siya mismo ang nakasapo sa biktima nga wala na sang panapton sang amo nga tion.
Gilayon nila nga gindala sa hospital ang biktima apang wala na natabangan pa.
