ILOILO CITY-Wala sang pagbag-o sa mga protocol nga ipatuman sang gobyerno kasunod sang bag-o nga deklarasyon sa community quarantine classifications.
Sa interview sang Bombo Radyo kay Atty. Roy Villa, spokesperson sang Regional Inter-Agency Task Force, iya ginpahayag nga bangud nagapabilin sa Modified General Community Quarantine ang bug-os nga Western Visayas, epektibo sa gihapon ang mga protocol nga ginpatuman humalin sang Hunyo 1 tubtob Hunyo 15.
Suno kay Atty. Villa, kun may yara man sang mga pagbag-o, menor lang ini kaangay sang posibilidad nga mangin talunsay na ang byahe sang barko nga may ruta Iloilo City- Bacolod City and vice versa, operasyon sang mga commercial flights, kag ang pagpahanugot sang pag-angkas sa motorsiklo.
Padayon naman ang sweeper flights kag trips sang mga barko nga nagakarga sang mga Locally Stranded Individuals kag repatriated Overseas Filipino Workers.
Samtang, may kaangtanan naman sa isa ka personnel sang Bureau of Fire Protection nga nagpositibo sa Coronavirus disease 2019 apang nagpanglugayawan pa kag gin-alegar nga gintago sang nasambit nga ahensya, ginpahayag ni Villa nga itugyan na lamang niya ini sa Philippine National Police-Criminal Investigation and Detection Group bangud wala sang poder ang Regional Inter-Agency Task Force nga magpatigayon sang imbestigasyon.
Dugang sang natungdan, kinahanglan imbestigaran ini agud masanagan ang tanan kag manabat ang sin-o man nga may paglapas sa layi kag agud indi na masulit ang kaangay nga insidente.
