ILOILO CITY – Indi maglayo nga ideklarar ang Modified General Community Quarantine sa syudad sang Iloilo.
Ini ang pahayag ni Atty. Roy Villa, spokesperson sang Regional Inter-Agency Task Force, may kaangtanan sa status sang Iloilo City epektibo Hunyo 1 apisar nga may yara na sang resolusyon ang National Inter-Agency Task Force nga ang nasambit nga lugar lamang sa Western Visayas ang magapabilin sa General Community Quarantine.
Sa interview sang Bombo Radyo kay Atty. Villa, iya ginpahayag nga apisar nagadugang ang kaso sang Coronavirus Disease 2019 (COVID-19) sa syudad sang Iloilo apang ini ang indi makabig nga local transmission bangud nga repatriated Overseas Filipino Workers ang kalabanan sa mga nagpositibo.
Suno kay Atty. Villa, ang rekomendasyon nga magapabilin sa General Community Quarantine ang syudad sang Iloilo ang naghalin sa National Inter-Agency Task Force kag indi sa Regional Level.
May kaangtanan diri, ginpahayag ni Atty. Villa nga may yara sang pagsinapol ang Task Force kaupod ang mga opisyal sa Western Visayas subong nga adlaw, Mayo 30, agud istoryahan ang tuhoy sa ginaduso nga One Panay kag agud nga maplastar ang guidelines para sa transition sa Hunyo 1.
Gin-athag man sang natungdan nga gamay lang ang kinalain sang Modified General Community Quarantine kun ipaanggid sa General Community Quarantine.
