ILOILO CITY – Ginakabig na nga COVID free ang banwa sang Miag ao matapos nga maka recover ang pinaka ulihi nila nga COVID-19 patient.
Sa interview sang Bombo Radyo kay Miag ao Mayor Mac Napulan, iya ginpahayag nga magluwas sa nasambit nga pasyente nag negatibo naman ang resulta sang swab test sang iya nga pamilya.
Suno kay Napulan, dako ang nangin bulig sang gilayon nga pag-implementar nila sang lockdown sa ila banwa humalin sang may nagpositibo sa COVID-19 kag gilayon man nga pagpatigayon sang contact tracing bangud madasig nila nga natapna ang paglapta sang nasambit nga balatian.
Sa subong, ginapreparahan na nila ang natalana nga pag-abot sang mga Ilonggo Overseas Filipino Workers nga gikan sa ila banwa kag temporaryo subong nga nakahamtang sa isa ka hotel sa syudad sang Iloilo samtang nagahulat sang resulta sang ila Polymerase Chain Reaction Test agud masiguro nga negatibo sila sa COVID-19.
