ILOILO – Ginapasigurado sang Local Government Unit sang Miag-ao, Iloilo nga masunod ang tanan nga minimum health protocol sa patigayunon nga blood letting activity kaupod ang Dugong Bombo sang Bombo Radyo Iloilo sa Myerkules, Pebrero 3.
Ini ang kabahin man sang isa ka semana nga selebrasyon sang Salakayan Festival.
Sa interview sang Bombo Radyo kay Miag-ao, Iloilo Mayor Dr. Macario Napulan, iya ginpahayag nga updan sang Philippine Red Cross ang blood letting activity nga maga-umpisa las 8:00 sa aga tubtob las 12:00 sang udto.
All set na ang tanan suno sa alkalde sa diin hugot nga ipatuman ang pagsuksok sang face mask, face shield kag iban pa nga health protocol.
Kadungan sang blood letting activity, nanuhay-tuhay man nga mga aktibidad ukon programa ang pagahiwaton sa Salakayan Festival nga maga-umpisa bwas kag magatakop sa Pebrero 6.
Suno kay Napulan, apisar nga kanselado ang mga nakaandan nga aktibidad sa nasambit nga festival bangud sa COVID-19, may yara sa gihapon sang pila ka mga aktibidad nga pagahiwaton.
Lakip na diri ang pagbukas sang Agro-trade Fair sa atubang sang Municipal building sa diin magapartisipar ang mga manugpangisda, weavers kag mga mangunguma.
May yara man sang Salakayan Tribes Exhibit sa diin i-display ang mga props, panapton kag iban pa nga materyal nga ginagamit sang mga tribu.
Ang bloodletting activity kag iban pa nga kahiwatan ang patigayunon sa Justice Ramon B. Britanico Memorial Hall.
