ILOILO CITY-Nagapati ang mayoralty candidate sa Miagao, Iloilo nga si Engr. Anthony Ticorda nga politically motivated ang pag-aresto sa iya angot sa kaso nga 6 counts of estafa.
Matandaan nga sang Pebrero 15, gindakop ini sa banwa sang Miagao sang gintingob nga pwersa sang Sara kag Miag-ao PNP pinaagi sa isa ka warrant of arrest angot sa mga kaso nga gin-file sa banwa sang Sara.
Sa interview sang Bombo Radyo kay Engr. Ticorda, iya ginpahayag nga Oktubre 2021 pa ang petsa sang nasambit nga warrant of arrest apang ginkatingala niya nga sini lang ini ginpagwa.
Suno kay Ticorda, kaangay nga ginkalkal gid ang nasambit nga mga dokumento kag arestuhon siya kag pakahuy-an sa mismo adlaw nga nagpatigayon sila sang Unity Walk kag peace covenant signing sang amo nga adlaw.
Wala naman ginpangalan ni Ticorda kun sin-o ang ginatumod niya nga posible sa likod sang pagpaaresto sa iya.
Si Ticorda ang isa sa nagapadalagan sa pagka-alkalde sa idalom sang Partido Federal ng Pilipinas kag kasumpong sini si anay Iloilo 1st District Congressman Richard Garin.
