Halos isa ka semana makaligad ginkoronahan ang bag-o nga Miss Universe sa El Salvador, gin-anunsyo sang organisasyon nga nakuha sang tiglawas sang Pilipinas ang Best National costume award!
Ginpahayag nga nakuha ni Michelle Dee ang pinakamataas nga boto sa app nga gingamit sang MUO agud matumod ang winner sa amo nga kategorya.
Naga-promote sang turismo sang Pilipinas ang eroplano nga costume ni Michelle kag isa man ka tribute sa iya papel bilang Air Force Reservist.
Bida man diri ang mga duag sang hayahay sang Pilipinas kag sa likod naman amo ang mural sang tourist attractions sa pungsod kun sa diin ang sentro amo ang slogan sang DOT nga “Love the Philippines.”
Himo ini sang designer nga si Michael Barrasi.
Nahibaluan nga magluwas nga nakuha ang Best National Costume award, si Michelle man ang Voice for Change gold winner, Spirit of Carnival awardee, kag nangibabaw man sa Miss Universe’s fan vote, apang nagtapos lamang bilang Top 10 finalist. #
