Kumpyansa ang 58-anyos nga former heavyweight champion nga si Mike Tyson sa pagbalik sini sa ring kadungan sang ginakalangkagan nga showdown batok sa 27-anyos nga si Jake Paul.
Patigayunon ang walo ka two-minute rounds boxing match sa AT&T Stadium sa Arlington, USA buwas sa aga oras sa Pilipinas (Nobyembre 16).
Suno kay Tyson ukon kilala nga “Iron Mike”, apisar sang iya edad, mas mabakod siya subong kag nagsugod siya sa training halin sang nagpasugot siya sa sambuwa.
Retirado na siya sa professional boxing halin sang 2005 kag may impresibo nga record nga 50-6 nga may 44 knockouts kag pinaka-kilala sa iya paghari sa heavyweight division sang late 1980s.
Katapusan siya nga nagsaka sa ring sang 2020 sa isa ka exhibition match batok sa isa man ka boxing legend nga si Roy Jones, Jr. kag nagtakop sa draw.
Kontrobersyal ang ila pag-atubangangay sang YouTube star-turned-boxer nga si Paul.
Una na nga gin-schedule ini nga hampang sang Hulyo 2024 apang gin-postpone bangud sa medical treatment kay Tyson bangud sa pagsuka sini sang dugo bangud sa bleeding ulcer.
31-anyos nga mas bataon si Paul kay Tyson nga kilala man sa professional boxing career sa super-middle kag cruiserweight.
Halin sa iya una nga away batok sa isa man ka YouTuber sang 2018, nalakip sa mga naatubang ni Paul amo ang isa ka basketball player, mixed martial arts fighters kag iban man nga professional boxers. Sa 11 fights, 10 ang iya nadag-an kun sa diin pito ang na-knockout. #
