Mangin transparent ukon hayag sa publiko ang deliberasyon sang ginaproponer nga P7.2-trillion nga national budget para sa 2027.
Suno ini kay Senator JV Ejercito nga amo subong ang chairman sang Committee on Finance nga gina-uyatan anay ni Senate President Sherwin Gatchalian sang nagligad nga tuig.
Suno kay Ejercito, padayunon sini ang mga reporma nga ginsuguran ni Gatchalian kaangay sang paghatag sang online access sa mga impormasyon nga kinahanglan mahibaluan sang publiko kaangot sa budget.
Suno pa sa senador, nagpahibalo na ini sa iya mga kaupdanan nga indi pagbatunon ang last-minute insertions ukon amendments ilabi na kadungan sang bicameral conference committee.
Dulaon naman ang small committee ukon sikreto nga mga pagsinapol kun sa diin nagakatabo ang mga “milagro” kag “magic”.
“This early, I already told our counterparts that I will not accept anymore last-minute insertions or amendments especially during the bicam. We will have an open bicam, hindi na yung sikreto. Wala na yung small committee where all the miracles and magic happen. Wala nang ganon, wala nang small committee,” pahayag sini.
Paagi sa bukas nga mga pagsinapol, nagalaum si Ejercito nga mabalik ang salig sang mga Pilipino sa Senado.
“This will be a very big challenge but we really need to win back the trust of the people by being transparent,” dugang pa sang senador.
Ginahingyo man sini ang civil society groups, ang academe, kag ang iban pa nga stakeholders nga magpartisipar sa budget process sa baylo nga mag-obserbar lamang kun ano ang nagakatabo.
