Tatlo ka tawo ang patay samtang apat naman ang pilason matapos ang encounter sa tunga sang duha ka grupo sang Moro Islamic Liberation Front (MILF) sa Barangay Linantangan,Shariff Saidona Mustapha, Maguindanao del Sur.
Suno sa Police Regional Office-Bangsamoro Autonomous Region, sakay sang tatlo ka minivan ang mga tinawo nanday MILF Commander Malimbuteng kag Zainudin Kairo, pareho nga katapo sang 128 MILF Base Command, sang gin-ambush sang grupo nanday Kagui Gani Adam, Esmail Salim kag Tuhami Mamulintao sa isa ka bain sang highway sa Barangay Linantangan.
Sanday Adam, Salim kag Mamulintao ang mga miyembro naman sang 118th MILF Base Command.
Ang mga napatay amo ang tatlo ka sakay sang mga naka-convoy nga minivan matapos nag-angkon sang madamo nga igo sang bala sa lawas samtang apat pa sa ila kaupdanan ang pilason.
Ginpahayag nga madugay nga may inaway ang grupo nga pareho nga katapo sang MILF.
Nag-ugat ang inaway bangud sa agaway sang mga teritoryo kag pulitika.
Magkaribal sa pulitika ang ila nga mga ginsuportahan sang nagligad nga May 12, 2025 nga eleksyon.
