Militar kag NPA nag-engkuwentruhanay sa Iloilo

ILOILO CITY – Nag-engkuwentruhanay ang militar kag New People’s Army (NPA) sa Barangay Igcabugao, Igbaras, Iloilo.
Ini matapos gintuyo sang mga rebelde nga sudlon ang patrol base sang Charlie Company sang 3rd Infatry Division sang Philippine Army sa Barangay Igcabugao nga nagabantay sa hydropower plant sa lugar.
Sa interview sang Bombo Radyo Iloilo, ginpahayag ni Lt. Col. Vener Morga, battalion commander sang 82nd Infantry Battalion nga lima tubtob pito ka miyembro sang rebelde ang nagkamang pakadto sa patrol base sang militar.
Ginpalukpan ang mga ini sang tropa sang militar kag nagbalos man ang NPA rason sang nagluntad nga engkuwentro sa tunga sang magtimbang nga bahin.
Wala sang napilasan sa militar apang may mga pilason sa bahin sang mga rebelde.
Ginpahayag ni Lt. Col. Morga nga antis sang engkuwentro, gintuyo man nga atakehon sang mga rebelde ang headquarters sang Charlie Company sang Barangay Igtalungon, Igbaras.
Nagapati ang militar nga ang pagsabwag sang kalakasan sang New People’s Army ang may kaangtanan sa pagdumdom sang ika-43 nga anibersaryo sang 3rd Infantry Division sang Philippine Army sa Visayas.