ILOILO CITY- Padayon ang hot pursuit operation sang mga katapo sang militar sa kapin 10 tubtob 15 ka mga myembro sang rebelde nga grupo nga ila nakaengwentro sa Brgy. Jayubo, Lambunao, Iloilo.
Sa interview sang Bombo Radyo kay Major Alvin dela Cruz, Civil Military Operations Officer sang 82nd Infantry Battalion, iya ginpahayag nga alerto gihapon ang ila tropa sa pag-ayam sa mga rebelde ilabi pa nga kumpirmado nga madamo sa ila ang pilason kasunod sang engkwentro.
Suno kay dela Cruz, padayon man ang ila panawagan sa mga rebelde nga mag-surrender.
Pahayag pa niya, maathag nga ang pinakaulihi nga mga aktibidad sang mga rebelde nga pagpang-harass kag pagpangilkil ang nagapatimaan nga kulang na sila sa logistics kag nagaluya na ang mga rebelde.
