Gin-anunsyo sang China nga magapatigayon ini sang bag-o nga military exercises sa Yellow kag Bohai seas matapos ang ila drills nga nagpalibot sa Taiwan sang nagliligad nga inadlaw.
Nahamtang ang Yellow Sea sa tunga sang China kag sa Korean peninsula. Ginapahayag nga magatapos ang adlaw-adlaw nga military drills sa tunga-tunga sang Agosto. May himuon man nga live-fire exercises.
May isa man ka bulan nga military operation sa isa ka area as Bohai sea sa east coast sang China. Ginapahayag man nga may separado nga military drill sa northern part sang Bohai sea.
Matandaan nga ginhimo ang una nga exercises bangud naakig ang Beijing sa pagbisita ni US House Speaker Nancy Pelosi sa Taiwan.
Kahapon kuntani ginlauman nga magatapos ang amo nga exercises apang wala sang kumpirmasyon nagikan sa China ukon Taiwan kun natapos na gid man ang ginahimo sang China.
Nagpahayag naman ang Taiwan nga “naga-practice” na ang China sa pag-invade sa Taiwan, lugar nga gina-angkon sang Beijing bilang ila kaugalingon nga teritoryo.
Sini lang nga Domingo, may yara sang senior Chinese military analyst nga nagsiling nga maga-conduct na ang China sang “regular” military drills malapit sa Taiwan. Ini bangud ginalantaw sang China ang Taiwan bilang breakaway province nga mapaidalom sa kontrol sang Beijing, apang para naman sa Taiwan, isa sila ka self-ruled island nga separado sa mainland. ##
