Magapadayon ang operasyon sang militar sa West Philippine Sea apisar pa sang krisis nga ginaatubang subong sa produktong petrolyo dala sang giyera sa Middle East.
Suno kay Armed Forces of the Philippines (AFP) spokesperson for the West Philippine Sea Rear Adm. Roy Vincent Trinidad, indi pag-untaton ang operational activities bangud kabahin ini sang mandato sang militar nga proteksyunan ang teritoryo sang Pilipinas.
“For the AFP, all operational matters will continue. We could not afford to have a letdown in performing our mandate,” pahayag ni Trinidad.
Antes sini, may direktiba si President Ferdinand Marcos, Jr. sa tanan nga ahensya sang gobyerno nga dapat magkinot sa enerhiya. Ginpamangkot si Trinidad kun maapektuhan bala sini ang mga pagpatrolya kag iban pa nga mga aktibidad sa West Philippine Sea.
Sabat sang spokesperson, ang tanan nga adjustments nga naangot sa pagkinot sang gatong ang iga-addres sang AFP leadership sa institutional level.
Sa latest monitoring sang Philippine Navy, may nakit-an nga 30 ka Chinese vessels sa West Philippine Sea halin sang Marso 1 tubtub Marso 8.
Sa numero nga ini, pinakadamo ang yara sa Panatag Shoal kun sa diin may 11 ka sakayan ang China, lakip ang apat halin sa People’s Liberation Army Navy (PLAN) kag pito halin sa China Coast Guard (CCG).
Walo naman ang na-monitor sa Ayungin Shoal; pito sa Escoda Shoal; kag apat naman ang yara naka-estasyon malapit sa Pag-asa Island.#
