CHINA – Siling nila, “the only constant in life is change”, positibo man ukon negatibo.
Halimbawa diri amo ang “from rags to riches” nga istorya nga nagahatag sang inspirasyon sa tanan apang paano kun baliskad ang natabo kasubong abi sang milyonaryo nga nag-imol bangod sa sugal ukon iban pa nga bisyo.
Apang indi tanan nga manggaranon nga nag-imol ang bangud sa sugal ukon bisyo bangud nga sa Jilin Province sa China, isa ka lalaki nga milyonaryo ang nag-imol bangud sa maayo nga kawsa.
Ang 29 anyos nga si Wang Yan ang naggasto sang iya manggad sa pag-rescue sang mga ido nga biktima sang pagpang-abuso.
Ang nasambit nga kawsa ni Wang Yan ang nag-umpisa sang nadula ang iya nga ido kag samtang ginapangita ang hinuptanan, nasaksihan niya mismo ang kalbaryo sang iban nga ido.
Bangud sa kalouy, nagdesisyon si Wang Yan nga himuon ang iya factory nga isa ka animal rescue base.
Ang minilyon ka pesos nga manggad ang gingamit sang natungdan sa rescue operations kag sa pagtatap sa mga ido tubtub nga naputo.
Apang sa pihak sini, wala sang may ginhinulsulan si Wang Yan bangud luyag lang niya magbulig bangud ang manggad suno sa iya ang materyal lamang kag indi man ini madala sa pihak nga kinabuhi.
Bangud sa maayo nga hinimuan ni Wang Yan, madamo ang nagdayaw kag nagpalab-ot sang donasyon para sa mga rescue dogs.
