May ginasundan na nga persons of interest ang Mina Municipal Police Station kasunod sang pagpangawat sang masobra P100,000 nga balor sang pantat sa isa ka hatchery sa Brgy. Abat, Mina, Iloilo.
Sa interview sang Bombo Radyo kay Police Captain Isagani Tabares, hepe sang Mina MPS, iya ginpahayag nga at least duha ka mga tawo ang makabig nga may kahimuan, apang magluwas diri, padayon pa ang pagpaninguha sang awtoridad nga makapangita sang testigo.
Wala ginadula sang pulisya ang posibilidad nga sa kapareho man nga barangay ukon sa kaiping nga lugar nagatinir ang mga suspek.
Ini bangud katalunan na ang likod sang pantatan kag wala na sang mga balay nga posible magpabudlay sa suspek kun indi ini pamilyar sa lugar.
Antes ang insidente sang Mayo 2, nakahaw-as pa sang pantat sa kaingod nga fishpond kag posible suno sa pulis nga didto man ang suspek nga naka-check na sang lugar.
Sa subong, wala pa sang nabaton nga report ang mga awtoridad nga may mga breeder nga pantat nga nabaligya sa kaiping nga mga area.
Nahibaluan nga masobra sa 250 ka bilog nga breeder sang pantat nga nagabug-at nga indi magnubo sa 300 kilograms ang nakuha sang mga kawatan.
