Nagpasalig ang Iloilo Police Provincial Office (IPPO) nga tutokan ang kaso sang negosyante nga ginpaarakan sang tiro sang wala pa makilalal-an nga mga suspetsado sa Mina, Iloilo.
Ang biktima amo si Teodoro “Tikboy” Camarista, 66, residente sang Amiroy, Mina.
Sa interview sang Bombo Radyo kay Police Major Rolando Araño, Spokesperson sang Iloilo Police Provincial Office, iya ginpahayag nga on going ang imbestigasyon sang otoridad kag may ginpahamtang na nga mga kapulisan sa palibot sang lugar agud masekyar ang biktima.
Suno kay Araño, isa man ini ka pamaagi agud nga indi na pagbalikan pa sang mga suspetsado ang rest house ni Camarista.
Ginpahayag man sini nga sa subong, indi pa matumod ang motibo sang mga suspek sa pagpangluthang, apang nagpasalig ini nga gilayon ibuyagyag kon may matukiban.
Nag-agum man sang pilas sa tiil ang biktima matapos nga aksidente sini nga natiro.
Gin-athag man ni Araño nga malayo sa pulitika ang natabo nga insidente, apisar nga matunog nga mabatian nga magapalansar bilang alkalde ang biktima.
