ILOILO – May pipila ka mga suhestyon ang Mines and Geosciences Bureau Region 6 sa Iloilo Provincial Environment and Natural Resources Office may kaangtanan sa quarry operations sa probinsya sang Iloilo.
Sa interview sang Bombo Radyo kay Engr. Raul Laput Officer-In-Charge Regional Director sang Mines and Geosciences Bureau, iya ginpahayag nga kinahanglan magserbe bilang fronliners ang mga barangay officials bangud sila ang una nga nakahibalo sang nagakatabo sa ila tagsa ka lugar.
Suno kay Laput, nagakadapat nga may ginahatag ang Provincial Environment and Natural Resources Office sang kopya sang permit sang quarry permittee sa barangay agud mahibaluan kun ini ang ginapatigayon nga legal.
Mas maayo man kun may ginapakita nga delivery receipt ang quarry permittee sa Local Chief Executives kag Barangay Officials kun magtransport ini sang sand and gravel materials halin sa Iloilo tabok sa Guimaras.
Dugang pa sang natungdan, nagakadapat nga magpatigayon sang orientation ang Provincial Environment and Natural Resources Office sa barangay agud nga magiyahan sa mga nagakadapat nga himuon sa tion nga may quarry operation sa ila barangay.
Nagpanugyan man ang Mines and Geosciences Bureau nga magpahamtang sang log book ang barangay nga magaserbe rekord sang vessel nga nagasulod kag nagaguwa sa ila lugar.
