Gina-validate pa sang Police Regional Office (PRO) VI kun sa diin ginakuha ang suplay sang droga nga nagaka-recover sa mga drug operations sa Western Visayas.
Sang damlag lang, magkasunod ang operasyon sang otoridad sa rehiyon nga lunsay masobra sa P1 million ang katumbas sang illegal drugs nga nakumpiskar.
Sa Barangay Singcang-Airport, Bacolod City, nadakpan sang mga pulis ang 25-anyos nga lalaki nga si Gerald Barillo, residente sang amo nga barangay, kag tambay lang ang opisyo.
Nakuha sa lalaki ang 20 ka sachets sang ginapatihan nga shabu nga may drug price nga P1,394,000.
Sa Iloilo City, arestado man sang nagligad nga semana sa Brgy Taal, Molo ang isa ka 46-anyos nga market vendor nga isa man ka ex-convict matapos nga nakuhaan man sang iligal nga droga.
Nakuha sa market vendor ang duha ka daku nga putos sang ginapatihan shabu kag 26 ka dugang nga sachets sang amo man nga illegal drugs.
Yara sa P1,360,000 ang drug price.
Sa interview sang Bombo Radyo kay Pol. Lt. Col. Arnel Solis, spokesperson sang PRO 6, iya ginpahayag nga ini nga mga operasyon ang resulta na sang ginpangtuad sang una nga naaresto nga mga drug suspects.
Todo gihapon ang kampanya kontra iligal nga droga suno kay Solis kag wala nagauntat ang mga pulis.
Wala sang na-monitor nga drug group nga aktibo sa Iloilo suno kay Solis apang may ginatutukan pa nga mga myembro sang daan nga drug groups sa Bacolod kag Negros Occidental.
