Ginpanginwala sang Ministry of Foreign Affairs sang China nga may kaangtanan ang ila gobyerno sa AI-generated video nga ginpagwa sang isa ka state-run media outlet.
Sa amo nga video, ginlaragway ang mga Pilipino bilang mga amo samtang ginakwestyon ang 2016 Arbitral Award nahanungod sa West Philippine Sea.
Suno kay Chinese Foreign Ministry spokesperson Lin Jian, wala siya sang komento nahanungod sa amo nga video bangud wala sang kahilabtanan ang gobyerno sang China sadto.
Apang ginpabaskog man sini liwat ang madugay nga panindugan sang Beijing nga wala nila ginakilala ang desisyon sang 2016 South China Sea arbitral ruling.
Suno sa iya, ilegal ini kag wala sang bisa.
Sa pihak nga bahin, nagpabilin nga determinado ang Pilipinas sa pagdepensa sang bisa sang amo nga desisyon.
Ginpahayag sang Pilipinas nga wala sang legal nga basihan ang pag-angkon sang China sa gina-awayan nga kadagatan.
Una sini, ginpangabay sang Department of Foreign Affairs (DFA) ang state-run media outlet nga e-delete ang AI-generated video sa social media.
Gintawag sang DFA ang video bilang racist, makainsulto, kag indi manami para sa dignidad sang mga Pilipino.
