Masobra duha ka oras ang ginhulat sang minority senators sa Senado apang wala nagsugod ang sesyon matapos nga wala sang bisan isa halin sa majority bloc nga nagsipot sa session hall.
Natabo ini matapos gin-aresto si Senator Jinggoy Estrada sa Senate premises bangud sang warrant of arrest sang Sandiganbayan sa iya plunder case nga naangot sa flood control scandal.
Alas singko sa hapon kahapon, Hunyo 1, magasugod kuntani ang sesyon. 4:50 pa lamang, ginpahuni na ang Senate quorum bell nga amo ang traditional signal agud nga tawgon na ang mga senador. Duha ka oras man nga naghuni ang amo nga signal bangud 11 lang ang senador sa plenaryo bisan nga yara na ang choir kag iban nila nga mga bisita.
Pasado alas tres sang gindakop si Estrada kag lakip sa nag-upod amo mismo si Senate President Alan Peter Cayetano.
Sa presscon ni Estrada, yara si Senator Rodante Marcoleta, si Senator Imee Marcos, kag ang mag-utod nga Camille kag Mark Villar.
Wala sang bisan isa halin sa mayorya nga nagpaathag kun ngaa nga absent sila.
Sang 6:20 sang gab-i, nag-post na si Senate President Alan Peter Cayetano nga nagahangkat sa minority senators nga tugutan nga mangin malinong ang Senado kasunod sang pag-aresto kay Estrada. Wala ginmensyonar ni Cayetano nga “boycott” ang iya buot silingon, apang ginhangkat sini ang minority nga magbiya sa Session Hall.
“I am asking you to join one deliberate act — to let the Senate go quiet, together and by choice, so the country is made to ask why a co-equal branch would fall silent rather than be made to serve. The door is open. What you do with it is yours to answer — to this institution, and to the people watching it,” suno sa Senate President.
Pagkatapos sini, may iban sa minority senators nga nagguwa na sa plenary hall kag nagkadto sa lounge.
Sang alas syete na, nagpa-picture ang minority sa rostrum kun sa diin ginpalakpakan sila sang mga tawo sa gallery.
Bangud yara man gihapon ang choir nga amo ang naka-schedule nga magkanta sang Lupang Hinirang, gintugutan sila nga magkanta sang national anthem, gin-updan sang minority senators, media, kag staff.
Ginbuyagyag pa ni Sen. Raffy Tulfo nga ginpatyan sila sang aircon kag internet samtang yara sila sa plenary hall.
Suno naman kay Senator Migz Zubiri, ini ang una nga tion nga dululungan nga nag-absent ang majority. Nagakatabo lamang ini suno sa iya kun may force majeure ukon kalamidad kun sa diin indi makakadto ang mga senador sa Senate Hall.
Suno naman kay Sen. Kiko Pangilinan, indi na ini isyu sang independence sang Senado kundi public accountability kag rule of law.
Nasubuan naman si Senator JV Ejercito sa natabo sa iya utod nga si Senator Jinggoy Estrada apang ginapanindugan sini nga bilang isa ka public servant, nagapati siya nga dapat nga sundon ang layi agud nga mahibaluan ang bug-os ang kamatuoran kag agud nga magpangibabaw ang hustisya.
Sa joint statement sang minority senators, ginpahayag nga ini ang una nga tion sa sulod sang dinekada nga wala nag-obra ang Senado bangud wala nag-abot ang presiding officer.
Bisan sa tion nga may bagyo kag may pandemya suno sa minority, gin-suspend lamang ang trabaho bangud sang “necessity” ukon bangud kinahanglan pa i-set up ang sistema, apang indi bangud nagpili ang liderato nga mag-boycott.
“This is a boycott because of the arrest of Senator Jinggoy Estrada, and the public should not be asked to believe another convenient line from a leadership that has repeatedly twisted the truth,” suno pa minority.
“Sa totoo lang, ang gusto nila ay kampihan, hindi prinsipyo. Gusto nila sumama kami sa boycott, patahimikin ang Senado at gamitin ang minority para manatili ang Senate President sa puwesto habang iniiwasan ang tunay na test of numbers sa floor,” dugang pa nila.
Bangud sang amo nga hitabo subong nga adlaw, wala man sang sesyon gani nga wala man sang may na-obra ang mga senador sa masunod nga mga hagna:
Magna Carta of Barangay Health Workers
Anti-Hospital Detention Bill
Confirmation of generals before the Commission on Appointments
Bills granting Philippine citizenship to athletes Bennie Boatwright III and Matthew James Ramos
Ginbilin man sang minority ang pamangkot kun ano naman ayhan ang himuon sang majority sa masunod nga duha ka session days.
“The question now is just as serious: will they do this again for the next two session days, and will they keep the Senate idle simply to avoid facing the numbers on the floor?,” kabahin pa sang joint statement.#
