𝗠𝗜𝗔𝗚𝗔𝗢, 𝗜𝗟𝗢𝗜𝗟𝗢 — Gintawag nga ‘political harassment’ sang minority leaders sang Sangguniang Bayan sang banwa sang Miag-ao, Iloilo ang pagkakas sang mga chairmanship sa pila ka mga komitiba paagi sa pagpasar sang resolusyon.
Sa interview sang Bombo Radyo kay Miagao Sangguninang Bayan Member Richard Esposo, iya ginpahayag nga pito sa mga Sangguniang Bayan member ang nagdesisyon nga kaksan sang chairmanship si SB Member Dr. Maria Salve N. Pechayco nga anay chairman sang Committee on Good Governance, Public Ethics and Accountability and Human Resource Development kag Committee on Games and Amusement, nga sa subong, wala sang bisan isa nga komitiba nga gina-uyatan.
Suno kay Esposo, lakip man sa ginkaksan sang chairmanship si SB member Dr. Jun Carlu A. Napulan nga anay chairman sang Committee on Social Welfare and Development, Committee on Tourism, Trade and Industry, kag Committee on Health and Sanitation, Population Control and Nutrition, apang, ginbaylohan agud mangin chairman sang Games and Amusement.
Ginpahayag man ni Esposo nga bisan siya ang ginkaksan man sang komitiba nga anay chairman sang Committee on Public Safety, Peace and Order kag Committee on Disaster Risk Reduction Management and Climate Change Adaptation, sa baylo, ginpakapot sa iya ang chairmanship sang Committee on Human Rights, Indigenous Peoples and Cultural Communities.
Ginsaysay man ni Esposo nga sang una pa lang nila nga pagpungko bilang mga opisyales, ginbotohan ang ila mangin mga posisyon kag ginpresentar kay Miagao Mayor Richard Garin.
Ginkwestyon man sang natungdan ang nangin rason sang mga majority leaders sang pagkakas sang ila chairmanship nga ang ginbasehan amo angdapat makatilaw man sang chairmanship ang iban nga SB members para sa isa kolaborasyon.
Rason man agud nga pamatokan sini ang tikang bangud nagapati siya nga wala sang kolaborasyon nga nagakatabo bangud ang pila sa ila nga kaupdanan ang wala na sang ginakaptan nga komitiba.
Nagapati naman si Esposo nga isa ka politikal nga pagpang-atake ang ginahimo sa ila bangud man sa ginabati-bati nga magapadalagan si Miagao Vice Mayor Dr. Macario N. Napulan sa 2025 elections.
Nahibaluan nga una nga nagpaiway nga mag-upod sa majority leader’s kag administrasyon sang banwa sang Miagao ang anak sang bise-alkalde nga si SB Member Dr. Jun Carlu A. Napulan.
