ILOILO CITY – Igaduso sang minorya sa Senado ang pagpatigayon sang joint session sang Kamara kag Senado agud talakayon ang Martial Law declaration ni Presidente Rodrigo Duterte.
Sa interview sang Bombo Radyo Iloilo, ginpahayag ni Sen. Francis “Kiko” Pangilinan nga apisar ila ginpamatian ang briefing sang mga opisyal sang Malacanang, kinahanglan gihapon ang joint session.
Ginpahayag sang senador nga magasapol ang Senate minority agud istoryahan ang himuon nga tikang.
Apang may consensus na sila suno kay Pangilinan, nga igaduso gid ang pagpatigayon sang joint session kag posible dal-on nila ini sa plenaryo buwas agud debatehan.
Kinahanglan suno kay Pangilinan nga maipalayag sa publiko ang desisyon sang Kongreso may kaangtanan sa Martial Law.
Apang gin-athag nga wala man nila ginadalian ang pagpatigayon sang joint session bangud dapat man balansehon suno sa senador ang ipaguwa nga impormasyon samtang nagapadayon ang military operation batok sa rebelde nga Maute sa siyudad sang Marawi.
Dapat anay suno kay Sen. Pangilinan nga hatagan sang tiyansa ang Armed Forces of the Philippines nga tungdan ang ila operasyon sa Marawi antis magpaguwa sang mga sensitibo nga impormasyon sa nagapadayon nga military operation.