Minors naaresto sa paglunsyar sang curfew for minors sa Iloilo, gindunganan sang gang war

ILOILO CITY – Naaresto ang apat ka mga menor-de-edad kadungan sang paglunsyar sang curfew for minors sa siyudad sang Iloilo sugod kagab-i.
Ginpahayag sa Bombo Radyo ni Iloilo City Social Welfare and Development Officer Marilyn Hison nga apat sa mga minors nga lunsay 17-anyos, ang nadakpan sa Boulevard, Molo, kun sa diin duha sa mga ini ang miyembro sang gang.
Suno sa iloy sang isa sa mga nadakpan nga menor-de-edad, mas maayo nga nadakpan ang iya bata agud matudluan ini sang leksyon.
Gindunganan man sang gang war ang paglunsyar sang curfew for minors sa siyudad.
Pilason ang biktima nga ginkilala lamang sa pangalan nga Jacklord, matapos ginpulihan sang Street Pamilya Cinco gang sa Old Airport, Mandurriao.
Na-engkuwentro sang grupo ni Jacklord ang 10 ka miyembro sang pihak nga gang sa Mandurriao plaza, kun sa diin kuntani ang mga ini magahampang sang basketball.
Ginpasiguro naman sang Task Force on Moral Values nga hugot nga ipatuman ang curfew para sa mga menor-de-edad.
Ginpahayag sa Bombo Radyo sang pinuno sang task force nga si George Duron nga ipatuman ang curfew sumugod alas-10:00 sang gab-i tubtob alas-4:00 sang kaagahon.
Kasuhan naman ang ginikanan sang mga menor-de-edad nga madakpan nga nagalapas sa curfew.