ILOILO CITY – Ginpaagi lamang sa live streaming kag sa live broadcast sa radyo ang misa nga ginpatigayon sa Jaro Metropolitan Cathedral.
Ang 6:30 sa aga nga misa nga ginpangunahan ni Msgr. Meliton Oso, director sang Jaro Archdiocesan Social Action Center, ang nabati-an live sa Bombo Radyo Iloilo.
Sa interview sang Bombo Radyo kay Msgr. Oso, iya ginpahayag nga ang nasambit nga lihok sang Simbahang Katolika ang isa ka paagi agud nga indi na madugangan pa ang kaso sang Coronavirus Disease 2019 (COVID-19).
Suno kay Msgr. Oso, indi sala ang indi pagtambong sang misa sa simbahan bangud nga mahimo man nga makapatigayon sang Santos nga Rosasryo ukon pagbasa sang Balaan nga Kasulatan bisan sa balay lang.
Ginpahayag ni Msgr. Oso nga sa tion sang krisis kasubong sa nagakatabo sa subong, mas ginpakamaayo na lang sang Simbahang Katolika nga ipaiway ang tanan nga religious activities bilang pagsunod sa panugyan sang gobyerno apang wala ini nagakahulugan nga mauntat na ang pagtuo sa Ginuo.
Magapabilin nga bukas ang Jaro Metropolitan Cathedral para sa mga maluyag magpangamuyo kag may kaangtanan diri, may yara sang alcohol kag sanitizers nga ginpahamtang agud nga magamit sang mga nagapangamuyo.
Kada adlaw, gina-disinfect man ang sulod sang simbahan agud nga masiguro ang kalimpyo kag ang ikaayong lawas sang mga deboto.
Ginpaboran man sang natungdan ang pagpangakig ni Iloilo City Mayor Jerry Treñas batok sa mga nagapalapta sang sala nga impormasyon kag ginapangunahan ang gobyerno bangud nga nagatuga lamang ini sang kakugmat sa tanan.
