Gin-athag sang optical professional nga ang kalabanan nga nagatubo nga ‘bump’ sa mata ang isa ka timos-timos ukon hordeolum.
Sa interview sang Bombo Radyo kay Dr. Mary Katherine Francia, Chairperson sang Department of Ophthalmology sa Western Visayas Medical Center (WVMC), iya ginpahayag nga may duha ka klase sang timos-timos, ini amo ang external kag internal.
Suno kay Francia, ang external hordeolum ang isa ka hapaw nga bump nga makit-an sa mata, samtang ang internal na man amo ang may mas madalom nga bump.
Gin-athag man sini nga ang external nga timos-timos ang yara lamang sa glands sang milok, rason nga kon magbunot sang strand sang sini, gilayon ini nga nagakupos.
Bangud man nga ang nana naga-agi sa ginbunotan sang milok rason nga nagaguwa ini gilayon.
Ginklaro man sang natungdan nga ang internal nga timos-timos ang indi magkupos bisan pa nga uboson gabot ang mga milok.
Ini bangud man sa madalom nga posisyon sini sa gland sang eyelashes.
