ILOILO CITY – Na-misinterpret lamang sang League of Municipalities of the Philippines – Iloilo Chapter ang nangin panabat kag pamatasan ni Dr. Ma. Luz De Los Reyes nga anay Schools Division Superintendent sa probinsya sang Iloilo.
Ini matapos nag-file sang petisyon sa Department of Education si Mayor Rosario Mediatrix “Trixie” Fernandez sang banwa sang San Enrique kag presidente sang League of Municipalities of the Philippines (LMP) – Iloilo Chapter kag mga alkalde sang probinsya agud kakson si De Los Reyes sa pwesto.
Kun balik-balikan, Mayo 15, 2023, ginmando ni Department of Education Undersecretary Atty. Revsee Escobedo ang pagkakas kay De Los Reyes sa katungdanan kag ginbalik liwat bilang Division Superintendent sang Division of Iloilo City.
Sa interview sang Bombo Radyo kay De Los Reyes, iya ginpahayag nga pribilehiyo kag indi kapyerdihan ang pag-assign sa iya sa bag-o nga katungdanan agud mas mapasanyog pa ang ikasarang bilang manunudlo.
Suno kay De Los Reyes, may yara sang rason kun ngaa kinahanglan matabo ang insidente, apisar may maayo ini nga katuyuan.
Gin-athag man sang natungdan nga normal para sa iya ang pagtaas nga tono sa diin nag-resulta ini sa kakulba ukon ‘stimulus’.
Indi man masabat ni De Los Reyes ang akusasyon sa diin ginatawag ini nga arogante bangud madamo sang nagapalangga sa iya nga mga alkalde kag mga gobernador sa ginhalinan nga trabaho.
