ILOILO CITY – Wala sang paghinulsol ang misis nga gin-utdan sang kinatawo ang iya bana sa Barangay Bancal, Carles, Iloilo.
Sa interview sang Bombo Radyo Iloilo, ginpahayag ni alyas Liezel nga ang sobra nga kaakig sa bana ang nagtulod sa iya nga timalusan ini paagi sa pag-utod sang iya kinatawo.
Madugay na suno kay “Liezel” nga may relasyon ang iya bana kag ang upod sini sa trabaho nga may kaugalingon man nga pamilya.
Suno pa sa suspek, ginkompronta mismo sini ang ginapahayag other woman sang iya bana apang indi ini mag-ako.
Ini na suno sa suspek ang ika-lima nga babaye sang iya mister.
Gin-ako sini nga antes niya ginkadtuan ang bana sa Barangay Barusbos, Carles kun sa diin nagaubra si Mark, ginplano na sini nga may himuon sa iya bana rason nga nagbitbit sang gunting.
Suno sa suspek, antes pa siya magkadto sa bana, may nag-text na sa iya nga nakita ang biktima kag ang babaye sini sa sulod sang isa ka kwarto.
Nag-updanay man sila inom-inom apang nagpakuno-kuno lang ini siya kag ginapasakayan ang bana.
Mga alas-10:00 sang gab-i sang sila ang nagtulog sang iya bana apang makaligad ang pila ka minutos, siya ang nagbugtaw kag ginbuhat ang plano.
Wala makabatyag suno kay “Liezel” si “Mark” sang iya ini ubahan, kag sang gin-utdan sang kinatawo, nagsinggitan lang ini apang wala man siya ginbalusan.
Duha ka beses nga gin-gunting sang misis ang kinatawo sang mister bangud nga gamay ang gunting rason nga wala matapat sa una niya nga pag-gunting.
Matapos nahimo ang krimen, gindala sang suspek ang ila anak sa iya utod kag nagbalik sa Barangay Bancal kag nagpaliwa-liwa sa dagat kun sa diin sini ginhaboy ang gunting.
Nakahanda naman si “Liezel” nga mapreso kun magpasaka sang kaso ang iya bana.