Ginkalipay ni Miss Earth 2015 Angelia Ong ang pagbisita sini liwat sa Capiñahan, Lemery, Iloilo agud tsekyaron ang mga survivors sang Super Typhoon Yolanda, apat ka tuig makaligad ang paglaslas sang bagyo.
Sa interview sang Bombo Radyo, ginpahayag ni Ong nga tumandok sang Lapuz Norte, Iloilo City, nga nalipay ini nga makita nga makayuhom na ang mga residente matapos ang ila naagyan sa bagyo.
Mainit suno sa beasuty queen ang pag-abi-abi sa ila sang mga residente, sa diin nalingaw man sila sa ginhalad nga saot.
Panugyan lang sini, indi paghawiran ang mga nakaligad na bangud may yara sang masanag nga palaabuton ang tanan.
Blessed naman ang pamatyag ni Miss Earth-Air 2016 Michele Gomez sa pagbisita sa mga biktima sang kalamidad.
Gintawag sini nga “amazing” ang pag-abi-abi sa ila kag nalipay ini nga makilala ang mga pumuluyo sa lugar.
Pahayag sang Colombian beauty queen, nabuligan niya ang mga biktima sang bagyo kag nabuligan man siya paagi sa pagpayuhom sa iya kag sa maayo nga pag-welcome sang mga Ilonggo.
Dugang pa sini, bisan ano ang matabo, kinahanglan nga mangin mabakod bangud yara ang Ginoo.