ILOILO CITY- Wala sang usikan nga oras si Miss Eco International Philippines 2025 Alexie Mae Brooks apisar nga sa masunod pa nga tuig patigayunon ang Miss Eco International pageant.
Sa interview sang Bombo Radyo kay Alexie, iya ginpahayag nga apisar hatagan niya sang bastante nga oras ang iya kaugalingon nga makapahuway, gamiton niya ini agud mas magsangkad pa ang iya nga ihibalo tuhoy sa advocacy sang pageant.
Suno kay Brooks, importante man sa iya ang mental preparation bangud sa pressure nga dala bilang tiglawas sang Pilipinas sa nasambit nga prestihiyoso nga beauty contest.
Dugang pa sang Ilongga beauty queen, pila lamang ang mahatagan sang kahigayunan nga mangin representative sang pungsod sa international pageant gan tinguhaan gid sini nga makuha ang korona.
Nahibaluan nga duha ka Pinay na ang nakakuha sang nasambit nga korona-si Cynthia Tomalla sang 2018 kag si Kathleen Paton song 2022.
