ILOILO CITY – Nangin madinalag-on ang paglunsyar sang Miss Iloilo 2020 bilang kabahin sa aktibidad sang Dinagyang Festival 2020.
Ang Miss Iloilo 2020 ang may tema nga “Ilongga’s Heartfelt Beauty”.
Sa interview sang Bombo Radyo kay Ms. Sarah Peña, chairman sang komitiba sa Miss Iloilo 2020, iya ginpahayag nga may yara sang tatlo ka mga mayor nga titulo nga mahimo makuha sang mga Ilongga.
Ini ang ginalakipan sang Miss Iloilo Dinagyang 2020, Miss Iloilo Bb. Pilipinas 2020 kag Miss Iloilo World 2020.
Suno kay Peña, ang mangin Miss Iloilo Dinagyang 2020, ang magapasakop sa Miss Aliwan Fiesta 2020; Samtang ang mangin Miss Iloilo Bb. Pilipinas 2020, ang magapasakop sa Bb. Pilipinas 2020; kag ang mangin Miss Iloilo World 2020 naman ang magapasakop sa Miss World 2020.
Nagapanawagan si Peña sa mga Ilongga nga magpakigbahin sa Miss Iloilo 2020 sa diin ang basic requirements amo nga kinahanglan nga babaye kag may dugo nga Ilongga; 5’6 ang height kag 17-25 ang edad.
Pahayag pa sang natungdan, ang application kag requirements para sa screening ang ipasa sa Oktubre 1 tubtob 31, 2019.
Ang Final Screening ang patigayunon sa Nobyembre 9, 2019 samtang ang Presentasyon sang mga kandidata naman sa Nobyembre 23, 2019.
Nahibaluan nga may yara sang tatlo ka mga duag nga maga-representa sa Miss Iloilo 2020 nga ginalakipan sang Purple nga may simbolo nga Faith, Yellow nga may simbolo nga Hope kag Pink nga may simbolo nga Love.
