𝗜𝗟𝗢𝗜𝗟𝗢 𝗖𝗜𝗧𝗬 – Nakahanda na ang bag-o ginkoronahan nga Miss Iloilo 2025 nga ipakilala ang pinasahi nga Iloilo sa national stage.
Ini amo si ang 27-anyos nga artist nga si Karen Nicole Piccio sang banwa sang Maasin.
Ginlutos ni Piccio ang siyam ka iban pa nga mga kandidata matapos ginkoronahan sa ginpatigayon nga koronasyon kagab-i sa West Visayas State University – Cultural Center sa La Paz, Iloilo City bilang kabahin sang selebrasyon sang Dinagyang Festival 2025.
Magluwas sa titulo, nakuha man ni Piccio ang awards sa Introduction Video, Advocacy and Tourism Video, Runway Model, kag Best In Closed-Door Interview.
Sa interview sang Bombo Radyo kay Karen, iya ginpahayag nga mabug-at ang iya responsibilidad bilang bag-o nga Miss Iloilo.
Apang nagapati ini nga sa bulig sang Diyos, masarangan sini ang iya papel bilang ambassadress of beauty and goodwill.
Nahibaluan nga si reigning The Miss Philippines-Eco International Alexie Mae Brooks ang nagkorona kay Karen bilang iya successor sa Miss Iloilo.
Si Karen ang ginakabig naman nga pageant veteran sa diin ginkoronahan naman ini bilang Miss Eco-Tourism Philippines 2019 kag Miss Manila: Woman of Wonder 2023 first runner-up.
