MANILA – Magasentro sa youth education ang mangin adbokasiya ni Miss Iloilo Universe Rabiya Mateo sa iya journey sa labing una nga edition sang Miss Universe Philippines 2020.
Sa Good Morning Philippines program, ginpahayag ni Rabiya nga nagatiglawas sang syudad sang Iloilo, nga masako siya sa pre-pageant activities humalin sang siya ang nagpasa sang application sa Miss Universe Philippines Organization.
Suno kay Rabiya, bugal para sa iya ang pagkalakip sa 52 ka opisyal nga kandidata kaupod ang Ilongga Flight Attendant nga si Kim Chi Crizaldo nga nagatiglawas naman sa probinsya sang Iloilo.
Ginpahayag ni Rabiya nga humalin sang siya ang nag-intra sa Miss Iloilo 2020, iya gid nga ginapanindugan ang adbokasiya bilang Review Center Lecturer nga may katuyu-an nga makahatag kag maka-paambit sang kaalam sa mga pamatan-on.
Bilang isa ka beauty queen, ginpahayag sang natungdan nga madamo sang mga pagpanghangkat nga dapat malampuwasan ilabi na ang online bashing.
May kaangtanan diri, ginpahayag ni Rabiya nga iya gid nga ginapanumdom nga normal lang ang ginatawag nga bashing apang nagakadapat nga hibaluon kun ano ang constructive critisism.
Bugal man para sa iya nga ginapaanggid siya kay Miss Universe 2011 3rd runner-up kag Miss Universe Philippines Organization national director Shamcey Supsup-Lee kag kay Miss World 2013 Megan Young apang suno kay Rabiya, luyag niya nga makilala sang tanan paagi sa iya pagkatawo bilang si Rabiya Meteo sang Balasan, Iloilo.
Sa subong, ginpahayag sang 23 anyos nga Ilongga beauty queen nga desidido siya nga makuha ang Miss Universe crown kag itiglawas ang Pilipinas sa international pageant.
