Matapos nangin kontrobersyal kag gintawag nga isa ka sahi sang scam, nagpaguwa na sang official statement ang Miss Planet International kag nagpahayag nga indi na madayon ang kumpetisyon sa Uganda sa Nobyembre 19 subong nga tuig.
Suno sa organisasyon, patigayunon na lamang ang pageant sa Cambodia sa Enero 2023.
Nagpaathag man ang organisasyon nga indi madayon ang Finals and Preliminary competitions bangud sang kapaslawan sang host organizers nga mag-comply kag mag-meet sa requirements agud matigayon ang event.
Nag-sorry man ang organisasyon sa natuga sini nga inconvenience.
Antes sini, pila na ka mga kandidata ang nagwithdraw lakip na si Herlene Budol nga tiglawas sang Pilipinas.
Ginpahayag man sang talent manager ni Herlene nga si Wilbert Tolentino nga nangin traumatic ang ila eksperyensya.
Pila pa ka mga kandidata halin sa iban nga pungsod ang nagsiling nga scam ang pageant kag naggastuhan lang sila kag nag-uyang sang tyempo sa ila pagpadulong sa Uganda.
