Ginsapubliko na sang Miss Supranational Organization ang staging date kag venues para sa international pageant.
Matabo ang “2025 Experience” halin sa Huny 9-28 sa Malopolska, Poland.
Suno sa organisasyon, masobra sa 70 “aspirational, inspirational women” ang magatipon kag maga-compete para makuha ang titulo bilang 16th Miss Supranational Brand Ambassador.
Ang magatiglawas sang Pilipinas subong nga tuig amo si Tarah Valencia sang Baguio City. Napilian siya sa coronation night sang nagligad nga tuig. Ka-batch siya nanday Chelsea Manalo, Alexie Brooks, kag Ahtisa Manalo.
Sang nagligad nga tuig, nangin Philippine representative si Miss Supranational Asia & Oceania Alethea Ambrosio. Isa siya sa top 10 queens sa Supra fan vote leaderboard kag semi-finalist sa Miss Supranational Supramodel of the Year challenge.
Katapusan nga nadag-an sang Pilipinas ang Miss Supranational crown sang 2013 sa persona ni Mutya Datul. Sang 2023, nangin first runner up naman si Pauline Amelinckx.
