ILOILO CITY – Lauman ang world class quality kag world class beauties sa koronasyon sang Miss Dinagyang Festival 2018.
Ini bilang kabahin sang mas ginpabongga nga pagsaulog sang Dinagyang Festival nga nagasaulog man sang ika-50 nga anibersaryo.
Suno sa chairman sang Miss Iloilo Dinagyang nga si Alex Soncio, indi basta-basta ang ila preparasyon para sa pageant.
Mangin host sang pageant night suno kay Soncio si Miss Universe 2011 3rd Runner-up Shamsey Supsup-Lee.
Magapungko naman sa panel of judges ang Asia’s Next Top Model winner nga si Maureen Wroblewitz kag ang “catwalk king” nga si Sinon Loresca.
Dugang pa ni Soncio, iya pa nga gina-negosyar ang apat ka nga mga beauty queens nga ginalakipan nanday Miss World 2013 Megan Young, Miss International 2016 Kylie Versoza, Miss Universe-Philippines 2016 Maxine Medina kag Miss International-Philippines 2017 Mariel De Leon agud mangin hurado sa Miss Iloilo Dinagyang 2018.