Sa una nga kahigayunan, ginpakigbahin ni Miss Universe 2018 Catriona Gray ang rason sang breakup nila sang aktor nga si Sam Milby.
Ginpahayag sini kun paano ini tuman nga nasakitan sang mahibaluan nga indi pa handa si Sam sa commitment sa ila relasyon nga duha matapos ang engagement sini.
Suno pa sa beauty queen-actress nga naghimakas pa ini nga maghimo sang madamo nga mga adjustments para mapabilin ang ila relasyon, apang suno pa sa iya nga kinahanglan na sini nga untaton bangud sobra na ang iya ginhimo agud nga mapabilin ini apang indi sa gihapon makita ni Sam nga ma-engage kay Cat.
Ginlaragway man ni Catriona bilang isa sa pinakamabudlay nga desisyon nga ginhimo sini sa iya nga kabuhi bangud matuod gid sini nga ginahigugma ang aktor.
Ginakonsiderar man ni Catriona ang na-eksperiensyahan nga sakit bilang isa ka lesson kag gin-ako ang man sini ang madamo nga mga kabudlayan nga gin-agyan sini sa relasyon nga ginkabig sini nga importante.
Suno pa sa beauty queen nga nagpaidalom man ini sa isa ka therapy matapos ang ila break up kag nakabulig man ini para mas mangin malapit pa ini sa iya mga ”core group.” kaangay sang iya pamilya kag mga kaabyanan.
Sa pihak sang natabo sini sa ila relasyon ni Sam, ginpakigbahin ni Catriona ang pagpati sa gihapon sa paghigugma kag padayon ini nga nagapangamuyo sa iya mangin bana sa pila kaadlaw.
Sa karon, nagapakig-date na ini isa ka non-showbiz guy, apang wala pa sini ginpasapubliko ang identity sini.
Nahibaluan nga ginpasapubliko ni Catriona kag Sam Milby ang ila nga engagement sang tuig 2023 kag ila ginkumpirmar ang ila break up sang tuig 2025.
