Kilala ang Pilipinas nga powerhouse sa pageant, gani indi na bag-o nga diri nagahanas ang pambato sang iban nga mga pungsod para sa ginakalangkagan nga Miss Universe pageant.
Subong nga tuig, lakip sa naglupad padulong sa Pilipinas para sa training amo ang mga kandidata sang Great Britain, Egypt, kag Bahrain.
Ang 31-anyos kag Pinay-Scottish beauty nga si Christina Chalk nga naka-intra man anay sa Miss Universe Philippines subong nga tuig ang maga-representar sang Great Britain.
Magluwas sa training sa Britanya, ginkasakuan man sini ang pasarela kaupod ang iya Pinoy coach nga si Zico Manzano.
Si Shereen Ahmed naman sang Bahrain kag si Logina Salah sang Egypt ang pareho nga nangin masako sa lima ka oras nga training sang damlag lang agud nga matutukan ang ila poses, Q&A, kag pasarela.
Isa ka half-Filipina kag half-Bahraini si Shereen kag inspirasyon sini ang Filipina beauty queen nga si Pia Wurtzbach nga nakakuha sang Miss Universe title sang 2015.
Si Salah naman ang isa ka single mom kag may yara sang rare skin condition nga ginatawag nga vitiligo. Isa ini ka sakit nga nagaresulta sa pagkadula sang skin color kag nagaputi ang agi sini sa iya nga nawong.
Kun may pagkapareho man ang tatlo ka kandidata, pareho sila nga lampas na sa edad nga 28-anyos nga amo anay ang age limit antes ginkakas sang organisasyon ang age restriction.
130 tanan ang kandidata nga maga-compete para sa korona subong nga tuig lakip ang tiglawas sang Pilipinas nga si Chelsea Manalo.
Ginalauman nga maga-abot sila sa Mexico sa Oktubre 29, magasunod ang preliminaries sa Nobyembre 14, kag balantayan naman ang final night sa Nobyembre 17.#
