Nagpaguwa na sang official statement ang Miss Universe Philippines organization nga nagapanginwala sa alegasyon nga wala sila nagbayad sa trophies nga gingamit para sa coronation night sang national pageant.
Kasunod ini sang ginwaragwag sang Pinoy artist nga si Jef Albea nga nangindulaan na lamang ang organisasyon kag wala nagbayad sa mga tropeo nga iya ginpangabudlayan.
Sa statement sang organization, gintawag nga “unfounded allegations” ang ginpahayag ni Albea bangud sa pagkamatuod suno sa MUPh, may komunikasyon sila sa staff kaangot sa amo nga isyu.
“The Miss Universe Philippines Organization vehemently denies the unfounded allegations made by Jef Albea regarding the payment for the trophies he supplied. Contrary to his claims, we have had communications with his staff on this matter,” kabahin sang statement.
Nagpaathag man ang organisasyon nga may standard procedure para sa billing para sa suppliers sa sponsors gani nga kinahanglan ang documentation para sa kada transaksyon.
“We categorically deny that the MUPh Org. neither refused to pay, disregarded or ignored payment for the trophies. In accordance with the standard procedure of billing for suppliers to sponsors, MUPh needs proper documentation for the said transaction,” dugang sang organisasyon.
Gindugang man sini nga indi sila magduha-duha sa paghimo sang legal action agud ma-address kag ma-resolba ini nga akusasyon. Naghingyo man ang MUPh sa publiko nga indi na magpalapta pa sang misinformation.
Matandaan nga sa post ni Albea sang Myerkules, ginsiling sini nga indi na ini magbaton sang kuwarta halin sa organisasyon, apang kadungan sini, nagpanawagan ini sang respeto nga ihatag sa kaangay niya nga artists.
Sang nagligad nga Mayo sang ginpatigayon ang coronation sang Miss Universe Philippines kun sa diin gindeklarar nga winner si Chelsea Manalo sang Bulacan nga amo ang magatiglawas sang Pilipinas sa Mexico.
