ILOILO CITY – Wala sang epekto sa Pilipinas ang missile drills nga ginapatigayon sang China sa South China Sea.
Kasunod ini sang ginpatigayon nga missile drill sang China sa gina-agawan nga teritoryo sang damlag lang.
Sa interview sang Bombo Radyo, ginpahayag ni Presidential spokesperson Harry Roque nga geo-politics ang nagakatabo sa West Philippine Sea kun sa diin nagapatayog-tayog sang puwersa ang China kag Amerika.
Wala man ginakabig sang US kag Beijing ang Pilipinas nga pamahog sa ila gani indi makaapekto sa pungsod suno kay Roque ang mga aktibidad sang China kag Estados Unidos sa West Philippine Sea.
Ang panindugan ni Presidente Rodrigo Duterte suno kay Roque nga bangud lunsay abyan man sang Pilipinas ang duha ka pungsod, ginpili sini nga magpakig-abyan sa China.
Samtang, ginpahayag ni Roque nga indi anay dapat pagpatihan ang ginapahayag nga pagbaylo sang Chinese coast guards sang noodles sa isda nga makuha sang mga Pinoy fishermen sa Scarborough Shoal.
Napalab-ot na ini sa China suno kay Roque kag ila pa ginahulat ang mangin paathag sang Beijing.