Nakasulat na ang Pilipinas sa Japan agud magpangayo sang bulig nga makit-an ang bangkay sang mga manugbulang nga gin-alegar nga yara sa Taal Lake.
Suno kay Justice Secretary Jesus Crispin Remulla, kinahanglan ang technical expertise sang Tokyo para mausisa kun didto gid man ang mga biktima.
Nauna na nga ginpahayag sang isa sa mga akusado nga subong whistleblower nga si Julie “Dondon” Patidongan nga didto gintagbong ang mga bangkay, kag suno kay Remulla, may dugang nga mga testigo nga nagpanugid nga didto gid man ginhaboy ang mga manugbulang.
2022 sang nag-umpisa ang DOJ sa pagpangdakop sa mga police kag security personnel nga gin-alegar nga may kahilabtanan sa pagkadula sang 34 cockfight industry participants, apang sa pagguwa sang testigo subong nga 2025, ginbulgar sini nga masobra sa 100 ang mga biktima.
Matandaan nga gintudlo ni Patidongan ang iya anay amo nga si Charlie “Atong” Ang nga amo ang mastermind kag gin-tag man si Gretchen Barretto nga may ihibalo sa krimen. Lunsay nanginwala ang negosyante kag ang aktres sa amo nga alegasyon.#
(Photo: Darlene Cay)
